|
|
|
1
И бысть внегда быти Ему на месте некоем молящуся, (и) яко преста, рече некий от ученик Его к Нему: Господи, научи ны молитися, якоже и Иоанн научи ученики своя.
2
Рече же им: егда молитеся, глаголите: Отче наш, иже на небесех, да святится имя Твое: да приидет Царствие Твое: да будет воля Твоя, яко на небеси, и на земли:
3
хлеб наш насущный подавай нам на всяк день:
4
и остави нам грехи нашя, ибо и сами оставляем всякому должнику нашему: и не введи нас во искушение, но избави нас от лукаваго.
5
И рече к ним: кто от вас имать друга, и идет к нему в полунощи, и речет ему: друже, даждь ми взаим три хлебы:
6
понеже друг прииде с пути ко мне, и не имам чесо предложити ему.
7
И той извнутрь отвещав речет: не твори ми труды: уже двери затворены суть, и дети моя со мною на ложи суть: (и) не могу востав дати тебе.
8
Глаголю же вам: аще и не даст ему востав, зане друг ему есть: но за безочьство его, востав даст ему, елика требует.
9
И Аз вам глаголю: просите, и дастся вам: ищите, и обрящете: толцыте, и отверзется вам:
10
всяк бо просяй приемлет, и ищяй обретает, и толкущему отверзется.
11
Котораго же вас отца воспросит сын хлеба, еда камень подаст ему? Или рыбы, еда в рыбы место змию подаст ему?
12
Или аще попросит яица, еда подаст ему скорпию?
13
Аще убо вы зли суще, умеете даяния блага даяти чадом вашым, кольми паче Отец, иже с небесе, даст Духа Святаго просящым у Него?
14
И бе изгоня беса, и той бе нем: бысть же бесу изшедшу, проглагола немый: и дивишася народи.
15
Нецыи же от них реша: о веельзевуле князи бесовстем изгонит бесы.
16
Друзии же искушающе, знамения от Него искаху с небесе.
17
Он же ведый помышления их, рече им: всяко царство само в себе разделяяся, запустеет: и дом на дом, падает.
18
Аще же и сатана сам в себе разделися, како станет царство его, якоже глаголете, о веельзевуле изгонящя Мя бесы.
19
Аще же Аз о веельзевуле изгоню бесы, сынове ваши о ком изгонят? Сего ради тии будут вам судии.
20
Аще ли же о персте Божии изгоню бесы, убо постиже на вас Царствие Божие.
21
Егда крепкий вооружився хранит свой двор, во смирении суть имения его:
22
егда же креплей его нашед победит его, все оружие его возмет, на неже уповаше, и корысть его раздает.
23
Иже несть со Мною, на Мя есть: и иже не собирает со Мною, расточает.
24
Егда (же) нечистый дух изыдет от человека, преходит сквозе безводная места, ищя покоя: и не обретая, глаголет: возвращуся в дом мой, отнюдуже изыдох.
25
И пришед обрящет и пометен и украшен:
26
тогда идет и поймет седмь других духов горших себе, и вшедше живут ту: и бывают последняя человеку тому горша первых.
27
Бысть же егда глаголаше сия, воздвигши некая жена глас от народа, рече Ему: блажено чрево носившее Тя, и сосца, яже еси ссал.
28
Он же рече: темже убо блажени слышащии слово Божие и хранящии е.
29
Народом же собирающымся начат глаголати: род сей лукав есть: знамения ищет, и знамение не дастся ему, токмо знамение Ионы пророка:
30
якоже бо бысть Иона знамение Ниневитом, тако будет и Сын Человеческий роду сему.
31
Царица южская востанет на суд с мужи рода сего, и осудит их: яко прииде от конец земли слышати премудрость Соломонову: и се множае Соломона зде.
32
Мужие Ниневитстии востанут на суд с родом сим и осудят и: яко покаяшася проповедию Иониною: и се, множае Ионы зде.
33
Никтоже (убо) светилника вжег, в скрове полагает, ни под спудом, но на свещнице, да входящии свет видят.
34
Светилник телу есть око: егда убо око твое просто будет, все тело твое светло будет: егда же лукаво будет, и тело твое темно:
35
блюди убо, еда свет, иже в тебе, тма есть.
36
Аще бо тело твое все светло, не имый некия части темны, будет светло все, якоже егда светилник блистанием прсвещает тя.
37
Егда же глаголаше, моляше Его фарисей некий, да обедует у него: вшед же возлеже.
38
Фарисей же видев дивися, яко не прежде крестися прежде обеда.
39
Рече же Господь к нему: ныне вы, фарисее, внешняя сткляницы и блюда очищаете, внутреннее же ваше полно грабления есть и лукавства.
40
Безумнии, не Иже ли сотвори внешнее, и внутреннее сотворил есть?
41
Обаче от сущих дадите милостыню: и се, вся чиста вам будут.
42
Но горе вам фарисеом, яко одесятствуете от мятвы и пигана и всякаго зелия, и мимоходите суд и любовь Божию: сия подобаше сотворити, и онех не оставляти.
43
Горе вам фарисеом, яко любите председания на сонмищих и целования на торжищих.
44
Горе вам, книжницы и фарисее, лицемери, яко есте яко гроби неведоми, и человецы ходящии верху не ведят.
45
Отвещав же некий от законник рече Ему: Учителю, сия глаголя и нам досаждаеши.
46
Он же рече: и вам законником горе, яко накладаете на человеки бремена не удобь носима, и сами единем перстом вашим не прикасаетеся бременем.
47
Горе вам, яко зиждете гробы пророк, отцы же ваши избиша их:
48
убо свидетелствуете и соблаговолите делом отец ваших: яко тии убо избиша их, вы же зиждете их гробы.
49
Сего ради и премудрость Божия рече: послю в них пророки и Апостолы, и от них убиют и изженут:
50
да взыщется кровь всех пророк, проливаемая от сложения мира, от рода сего,
51
от крове Авеля даже до крове Захарии, погибшаго между олтарем и храмом: ей, глаголю вам, взыщется от рода сего.
52
Горе вам законником, яко взясте ключь разумения: сами не внидосте, и входящым возбранисте.
53
Глаголющу же Ему сия к ним, начаша книжницы и фарисее бедне гневатися Нань и престати Его о мнозе,
54
лающе Его, ищуще уловити нечто от уст Его, да Нань возглаголют.
1
О нихже собравшымся тмам народа, яко попирати друг друга, начат глаголати учеником Своим первее: внемлите себе от кваса фарисейска, еже есть лицемерие.
2
Ничтоже бо покровено есть, еже не открыется, и тайно, еже не уразумеется:
3
зане, елика во тме ресте, во свете услышатся: и еже ко уху глаголасте во храмех, проповестся на кровех.
4
Глаголю же вам другом Своим: не убойтеся от убивающих тело и потом не могущих лишше что сотворити:
5
сказую же вам, кого убойтеся: убойтеся имущаго власть по убиении воврещи в дебрь огненную: ей, глаголю вам, того убойтеся.
6
Не пять ли птиц ценится пенязема двема? И ни едина от них несть забвена пред Богом.
7
Но и власи главы вашея вси изочтени суть. Не убойтеся убо: мнозех птиц унши есте вы.
8
Глаголю же вам: всяк, иже аще исповесть Мя пред человеки, и Сын Человеческий исповесть его пред Ангелы Божиими:
9
а отвергийся Мене пред человеки отвержен будет пред Ангелы Божиими.
10
И всяк иже речет слово на Сына Человеческаго, оставится ему: а на Святаго Духа хулившему не оставится.
11
Егда же приведут вы на соборища и власти и владычества, не пецытеся, како или что отвещаете, или что речете:
12
Святый бо Дух научит вы в той час, яже подобает рещи.
13
Рече же Ему некий от народа: Учителю, рцы брату моему разделити со мною достояние.
14
Он же рече ему: человече, кто Мя постави судию или делителя над вами?
15
Рече же к ним: блюдите и хранитеся от лихоимства: яко не от избытка кому живот его есть от имения его.
16
Рече же притчу к ним, глаголя: человеку некоему богату угобзися нива:
17
и мысляше в себе, глаголя: что сотворю, яко не имам где собрати плодов моих?
18
И рече: се сотворю: разорю житницы моя, и болшыя созижду, и соберу ту вся жита моя и благая моя:
19
и реку души моей: душе, имаши многа блага, лежаща на лета многа: почивай, яждь, пий, веселися.
20
Рече же ему Бог: безумне, в сию нощь душу твою истяжут от тебе: а яже уготовал еси, кому будут?
21
Тако собираяй себе, а не в Бога богатея.
22
Рече же ко учеником Своим: сего ради глаголю вам: не пецытеся душею вашею, что ясте: ни телом, во что облечетеся:
23
душа болши есть пищи, и тело одежды.
24
Смотрите вран, яко не сеют, ни жнут: имже несть сокровища, ни житницы, и Бог питает их: кольми паче вы есте лучши птиц?
25
Кто же от вас пекийся может приложити возрасту своему лакоть един?
26
Аще убо ни мала чесо можете, что о прочих печетеся?
27
Смотрите крины, како растут: не труждаются, ни прядут: глаголю же вам, яко ни Соломон во всей славе своей облечеся, яко един от сих.
28
Аще же траву, на селе днесь сущу и утре в пещь вмещему, Бог тако одевает: кольми паче вас, маловери?
29
И вы не ищите, что ясте, или что пиете: и не возноситеся:
30
всех бо сих языцы мира сего ищут: ваш же Отец весть, яко требуете сих:
31
обаче ищите Царствия Божия, и сия вся приложатся вам.
32
Не бойся, малое стадо: яко благоизволи Отец ваш дати вам Царство.
33
Продадите имения ваша и дадите милостыню. Сотворите себе влагалища неветшающа, сокровище неоскудеемо на небесех, идеже тать не приближается, ни моль растлевает.
34
Идеже бо сокровище ваше, ту и сердце ваше будет.
35
Да будут чресла ваша препоясана, и светилницы горящии:
36
и вы подобни человеком чающым господа своего, когда возвратится от брака, да пришедшу и толкнувшу, абие отверзут ему.
37
Блажени раби тии, ихже пришед господь обрящет бдящих: аминь глаголю вам, яко препояшется и посадит их, и минув послужит им.
38
И аще приидет во вторую стражу, и в третию стражу приидет, и обрящет (их) тако, блажени суть раби тии.
39
Се же ведите, яко аще бы ведал господин храмины, в кий час тать приидет, бдел убо бы, и не бы дал подкопати дому своего:
40
и вы убо будите готови: яко, в оньже час не мните, Сын Человеческий приидет.
41
Рече же Ему Петр: Господи, к нам ли притчу сию глаголеши, или ко всем?
42
Рече же Господь: кто убо есть верный строитель и мудрый, егоже поставит господь над челядию своею, даяти во время житомерие?
43
Блажен раб той, егоже пришед господь его обрящет творяща тако:
44
воистинну глаголю вам, яко над всем имением своим поставит его.
45
Аще же речет раб той в сердцы своем: коснит господин мой приити: и начнет бити рабы и рабыни, ясти же и пити и упиватися:
46
приидет господин раба того в день, в оньже не чает, и в час, в оньже не весть: и растешет его, и часть его с неверными положит.
47
Той же раб ведевый волю господина своего, и не уготовав, ни сотворив по воли его, биен будет много:
48
неведевый же, сотворив же достойная ранам, биен будет мало. Всякому же, емуже дано будет много, много взыщется от него: и емуже предаша множайше, множайше просят от него.
49
Огня приидох воврещи на землю, и что хощу, аще уже возгореся?
50
Крещением же имам креститися, и како удержуся, дондеже скончаются?
51
Мните ли, яко мир приидох дати на землю? Ни, глаголю вам, но разделение:
52
будут бо отселе пять во единем дому разделени, трие на два, и два на три:
53
разделится отец на сына, и сын на отца: мати на дщерь, и дщи на матерь: свекры на невесту свою, и невеста на свекровь свою.
54
Глаголаше же и народом: егда узрите облак восходящь от запада, абие глаголете: туча грядет: и бывает тако:
55
и егда юг веющь, глаголете: зной будет: и бывает.
56
Лицемери, лице небу и земли весте искушати: времене же сего како не искушаете?
57
Что же и о себе не судите праведное?
58
Егда бо грядеши с соперником твоим ко князю, на пути даждь делание избыти от него: да не како привлечет тебе к судии, и судия тя предаст слузе, и слуга всадит тя в темницу:
59
глаголю тебе: не изыдеши оттуду, дондеже и последнюю медницу воздаси.
1
Приидоша же нецыи в то время, поведающе Ему о Галилеех, ихже кровь Пилат смеси с жертвами их.
2
И отвещав Иисус рече им: мните ли, яко Галилеане сии грешнейши паче всех Галилеан бяху, яко тако пострадаша?
3
Ни, глаголю вам: но аще не покаетеся, вси такожде погибнете.
4
Или они осмьнадесяте, на нихже паде столп Силоамский и поби их, мните ли, яко тии должнейши бяху паче всех живущих во Иерусалиме?
5
Ни, глаголю вам: но аще не покаетеся, вси такожде погибнете.
6
Глаголаше же сию притчу: смоковницу имяше некий в винограде своем всаждену: и прииде ищя плода на ней, и не обрете:
7
рече же к винареви: се, третие лето, отнелиже прихожду ищя плода на смоковнице сей, и не обретаю: посецы ю (убо), вскую и землю упражняет?
8
Он же отвещав рече ему: господи, остави ю и се лето, дондеже окопаю окрест ея и осыплю гноем:
9
и аще убо сотворит плод: аще ли же ни, во грядущее посечеши ю.
10
Бяше же учя на единем от сонмищ в субботу:
11
и се, жена бе имущи дух недужен лет осмьнадесять, и бе сляка и не могущи восклонитися отнюд.
12
Видев же ю Иисус, пригласи и рече ей: жено, отпущена еси от недуга твоего.
13
И возложи на ню руце: и абие простреся и славляше Бога.
14
Отвещав же старейшина собору, негодуя, зане в субботу изцели (ю) Иисус, глаголаше народу: шесть дний есть, в няже достоит делати: в тыя убо приходяще целитеся, а не в день субботный.
15
Отвеща (же) убо ему Господь и рече: лицемере, кождо вас в субботу не отрешает ли своего вола или осла от яслий, и вед напаяет?
16
Сию же дщерь Авраамлю сущу, юже связа сатана, се, осмоенадесяте лето, не достояше ли разрешитися ей от юзы сея в день субботный?
17
И сия Ему глаголющу, стыдяхуся вси противляющиися Ему: и вси людие радовахуся о всех славных бывающих от Него.
18
Глаголаше же: кому подобно есть Царствие Божие? И кому уподоблю е?
19
Подобно есть зерну горушну, еже приемь человек вверже в вертоград свой: и возрасте, и бысть древо велие, и птицы небесныя вселишася в ветвие его.
20
Паки рече: кому уподоблю Царствие Божие?
21
Подобно есть квасу, егоже приемши жена, скры в сатех триех муки, дондеже вскисе все.
22
И прохождаше сквозе грады и веси, учя и шествие творя во Иерусалим.
23
Рече же некий Ему: Господи, аще мало есть спасающихся? Он же рече к ним:
24
подвизайтеся внити сквозе тесная врата: яко мнози, глаголю вам, взыщут внити, и не возмогут.
25
Отнележе востанет дому владыка и затворит двери, и начнете вне стояти и ударяти в двери, глаголюще: Господи, Господи, отверзи нам. И отвещав речет вам: не вем вас, откуду есте.
26
Тогда начнете глаголати: ядохом пред Тобою и пихом, и на распутиих наших учил еси.
27
И речет: глаголю вам, не вем вас, откуду есте: отступите от Мене, вси делателие неправды.
28
Ту будет плачь и скрежет зубом, егда узрите Авраама и Исаака и Иакова и вся пророки во Царствии Божии, вас же изгонимых вон.
29
И приидут от восток и запад и севера и юга, и возлягут в Царствии Божии.
30
И се, суть последнии, иже будут перви, и суть первии, иже будут последни.
31
В той день приступиша нецыи от фарисей, глаголюще Ему: изыди и иди отсюду, яко Ирод хощет Тя убити.
32
И рече им: шедше рцыте лису тому: се, изгоню бесы и изцеления творю днесь и утре, и в третий скончаюся:
33
обаче подобает Ми днесь и утре и в ближний ити: яко невозможно есть пророку погибнути кроме Иерусалима.
34
Иерусалиме, Иерусалиме, избивый пророки и камением побивая посланныя к тебе, колькраты восхотех собрати чада твоя, якоже кокош гнездо свое под криле, и не восхотесте?
35
Се оставляется вам дом ваш пуст. Глаголю же вам, яко не имате Мене видети, дондеже приидет, егда речете: благословен Грядый во имя Господне.
1
И бысть егда внити Ему в дом некоего князя фарисейска в субботу хлеб ясти, и тии бяху назирающе Его:
2
и се, человек некий, имый водный труд, бе пред Ним.
3
И отвещав Иисус рече к законником и фарисеом, глаголя: аще достоит в субботу целити?
4
Они же умолчаша. И приемь изцели его, и отпусти.
5
И отвещав к ним рече: котораго от вас осел или вол в студенец впадет, и не абие ли исторгнет его в день субботный?
6
И не возмогоша отвещати Ему к сим.
7
Глаголаше же к званным притчу, обдержя, како председания избираху, глаголя к ним:
8
егда зван будеши ким на брак, не сяди на преднем месте: еда кто честнее тебе будет званных,
9
и пришед иже тебе звавый и онаго, речет ти: даждь сему место: и тогда начнеши со студом последнее место держати.
10
Но егда зван будеши, шед сяди на последнем месте, да егда приидет звавый тя, речет ти: друже, посяди выше: тогда будет ти слава пред званными с тобою:
11
яко всяк возносяйся смирится, и смиряяйся вознесется.
12
Глаголаше же и ко звавшему Его: егда сотвориши обед или вечерю, не зови другов твоих, ни братии твоея, ни сродник твоих, ни сосед богатых: еда когда и тии тя такожде воззовут, и будет ти воздаяние.
13
Но егда твориши пир, зови нищыя, маломощныя, хромыя, слепыя:
14
и блажен будеши, яко не имут ти что воздати: воздаст же ти ся в воскрешение праведных.
15
Слышав же некий от возлежащих с Ним сия, рече Ему: блажен, иже снесть обед в Царствии Божии.
16
Он же рече ему: человек некий сотвори вечерю велию и зва многи:
17
и посла раба своего в год вечери рещи званным: грядите, яко уже готова суть вся.
18
И начаша вкупе отрицатися вси. Первый рече ему: село купих и имам нужду изыти и видети е: молютися, имей мя отречена.
19
И другий рече: супруг волов купих пять и гряду искусити их: молю тя, имей мя отречена.
20
И другий рече: жену поях и сего ради не могу приити.
21
И пришед раб той поведа господину своему сия. Тогда разгневався дому владыка, рече рабу своему: изыди скоро на распутия и стогны града, и нищыя и бедныя и слепыя и хромыя введи семо.
22
И рече раб: господи, бысть якоже повелел еси, и еще место есть.
23
И рече господин к рабу: изыди на пути и халуги, и убеди внити, да наполнится дом мой:
24
глаголю бо вам, яко ни един мужей тех званных вкусит моея вечери: мнози бо суть звани, мало же избранных.
25
Идяху же с Ним народи мнози: и обращься рече к ним:
26
аще кто грядет ко Мне, и не возненавидит отца своего и матерь, и жену и чад, и братию и сестр, еще же и душу свою, не может Мой быти ученик:
27
и иже не носит креста своего и вслед Мене грядет, не может Мой быти ученик.
28
Кто бо от вас, хотяй столп создати, не прежде ли сед разчтет имение, аще имать, еже есть на совершение?
29
Да не, когда положит основание и не возможет совершити, вси видящии начнут ругатися ему,
30
глаголюще, яко сей человек начат здати и не може совершити?
31
Или кий царь идый ко иному царю снитися с ним на брань, не сед ли прежде совещавает, аще силен есть срести с десятию тысящ грядущаго со двемадесятма тысящама нань?
32
Аще ли же ни, еще далече ему сущу, моление послав молится о смирении.
33
Тако убо всяк от вас, иже не отречется всего своего имения, не может быти Мой ученик.
34
Добро есть соль: аще же соль обуяет, чим осолится?
35
Ни в землю, ни в гной потребна есть: вон изсыплют ю. Имеяй ушы слышати, да слышит.
1
Бяху же приближающеся к Нему вси мытарие и грешницы, послушати Его.
2
И роптаху фарисее и книжницы, глаголюще, яко Сей грешники приемлет и с ними яст.
3
Рече же к ним притчу сию, глаголя:
4
кий человек от вас имый сто овец, и погубль едину от них, не оставит ли девятидесяти и девяти в пустыни и идет вслед погибшия, дондеже обрящет ю?
5
И обрет возлагает на раме свои радуяся:
6
и пришед в дом, созывает други и соседы, глаголя им: радуйтеся со мною, яко обретох овцу мою погибшую.
7
Глаголю вам, яко тако радость будет на небеси о единем грешнице кающемся, нежели о девятидесятих и девяти праведник, иже не требуют покаяния.
8
Или кая жена имущи десять драхм, аще погубит драхму едину, не вжигает ли светилника, и пометет храмину, и ищет прилежно, дондеже обрящет?
9
И обретши созывает другини и соседы, глаголющи: радуйтеся со мною, яко обретох драхму погибшую.
10
Тако, глаголю вам, радость бывает пред Ангелы Божиими о единем грешнице кающемся.
11
Рече же: человек некий име два сына:
12
и рече юнейший ею отцу: отче, даждь ми достойную часть имения. И раздели има имение.
13
И не по мнозех днех собрав все мний сын, отиде на страну далече, и ту расточи имение свое, живый блудно.
14
Изжившу же ему все, бысть глад крепок на стране той, и той начат лишатися:
15
и шед прилепися единому от житель тоя страны: и посла его на села своя пасти свиния:
16
и желаше насытити чрево свое от рожец, яже ядяху свиния: и никтоже даяше ему.
17
В себе же пришед, рече: колико наемником отца моего избывают хлебы, аз же гладом гиблю?
18
Востав иду ко отцу моему, и реку ему: отче, согреших на небо и пред тобою,
19
и уже несмь достоин нарещися сын твой: сотвори мя яко единаго от наемник твоих.
20
И востав иде ко отцу своему. Еще же ему далече сущу, узре его отец его, и мил ему бысть, и тек нападе на выю его, и облобыза его.
21
Рече же ему сын: отче, согреших на небо и пред тобою, и уже несмь достоин нарещися сын твой.
22
Рече же отец к рабом своим: изнесите одежду первую и облецыте его, и дадите перстень на руку его и сапоги на нозе:
23
и приведше телец упитанный заколите, и ядше веселимся:
24
яко сын мой сей мертв бе, и оживе: и изгибл бе, и обретеся. И начаша веселитися.
25
Бе же сын его старей на селе: и яко грядый приближися к дому, слыша пение и лики:
26
и призвав единаго от отрок, вопрошаше: что (убо) сия суть?
27
Он же рече ему, яко брат твой прииде: и закла отец твой телца упитанна, яко здрава его прият.
28
Разгневася же, и не хотяше внити. Отец же его изшед моляше его.
29
Он же отвещав рече отцу: се, толико лет работаю тебе и николиже заповеди твоя преступих, и мне николиже дал еси козляте, да со други своими возвеселился бых:
30
егда же сын твой сей, изядый твое имение с любодейцами, прииде, заклал еси ему телца питомаго.
31
Он же рече ему: чадо, ты всегда со мною еси, и вся моя твоя суть:
32
возвеселитижеся и возрадовати подобаше, яко брат твой сей мертв бе, и оживе: и изгибл бе, и обретеся.
|
|
|
