Глава 
1

Авд.1  с толкованием

1
Видение Авдиино: сия глаголет Господь Бог Идумеи: слух слышах от Господа, известие во языки посла: востаните, и востанем на ню ратию.

Авд.1:1  с толкованием

2
Се, мала дах тя во языцех, безчестен ты еси зело.

Авд.1:2  с толкованием

3
Презорство сердца твоего воздвиже тя живущаго в пещерах каменных: возвышаяй храмину свою, глаголяй в сердцы своем: кто мя свержет на землю?

Авд.1:3  с толкованием

4
Аще вознесешися якоже орел и аще положиши гнездо твое среде звезд, и оттуду свергу тя, глаголет Господь.

Авд.1:4  с толкованием

5
Аще бы татие влезли к тебе, или разбойницы нощию, камо бы повержен был еси? Еда не украли бы доволных себе? Или аще бы объемлющии виноград влезли к тебе, еда бы не оставили гроздия?

Авд.1:5  с толкованием

6
Како обыскася Исав, и взята быша сокровенная его?

Авд.1:6  с толкованием

7
Даже до предел испустиша тя: вси мужие завета твоего сопротивишася ти, премогоша тя мужие мирницы твои: (ядущии с тобою) положиша лесть под тобою, несть смысла в них.

Авд.1:7  с толкованием

8
В той день, глаголет Господь, погублю премудрыя от Идумеи и смысл от горы Исавовы:

Авд.1:8  с толкованием

9
и убоятся воини твои, иже от Феман, да отимется человек от горы Исавовы.

Авд.1:9  с толкованием

10
Посечения ради и нечестия, еже на брата твоего Иакова, покрыет тя студ, и отвержен будеши во век.

Авд.1:10  с толкованием

11
От негоже дне сопротивился еси во дни пленяющих иноплеменников силу его, и чуждии внидоша во врата его и о Иерусалиме вергоша жребия, и ты был еси яко един от них.

Авд.1:11  с толкованием

12
И да не презриши дне брата твоего в день чуждих, и да не порадуешися о сынех Иудиных в день погибели их, и да не велеречиши в день скорби:

Авд.1:12  с толкованием

13
и не входи во врата людий Моих в день болезни их, и не презри и ты сонма их в день потребления их, и не совещайся на силу их в день погибели их:

Авд.1:13  с толкованием

14
ниже настой на исходы их потребити избегающыя их, ниже заключай бежащыя их в день скорби.

Авд.1:14  с толкованием

15
Понеже близ день Господень на вся языки: якоже сотворил еси, сице будет ти, воздаяние твое воздастся на главу твою.

Авд.1:15  с толкованием

16
Понеже якоже еси пил на горе Моей святей, испиют вси языцы вино, испиют и снидут, и будут яко не бывшии.

Авд.1:16  с толкованием

17
В горе же Сиони будет спасение, и будет свята: и наследят дом Иаковль наследивших я.

Авд.1:17  с толкованием

18
И будет дом Иаковль огнь, дом же Иосифов пламень, а дом Исавов в тростие, и возгорятся на них и поядят я, и не будет избегаяй дому Исавову, яко Господь глагола.

Авд.1:18  с толкованием

19
И наследят иже во нагеве гору Исавову, и иже в раздолии иноплеменники: и возмут гору Ефремову и поле Самарийско, и Вениамина и Галаадитиду.

Авд.1:19  с толкованием

20
И преселения начало сие сыном Израилевым, земля Хананейска до Сарепты: преселение же Иерусалимле до Ефрафа: и наследят грады Нагевовы.

Авд.1:20  с толкованием

21
И взыдут спасаемии от горы Сиони, еже отмстити гору Исавлю, и будет царство Господеви.

Авд.1:21  с толкованием